بعض الرجال ان جيت تبحث خفاياه
نفسه من الفزعة قليل دسمها
لانافع نفسه وتكثر حكاياه
ولا فايد غيره ونفسه هزمها
هذا ومثله لاتدور على ارضاه
واجعل تحت رجيليك شلة ارممها
واتعب على بعده ودور ولفرقاه
وخله يروح وسكته في تممها
ولاتنخدع باهل الردى والمحاباه
وميز مابين اصقورها من رخمها
قلته وانا بالرجم عديت مرقاه
ونفسي على القمه يرفرف علمها
ولي هاجس بالشعر يوصل لمعناه
ينحت ذهب واشارتي يفتهمها
بنت من المارد منى القلب وادواه
بعمق البحر بالليل حثت قدمها
ادفيتها من برد قارس بليلاه
لليلة شتاء يطغى عليها عتمها
وصارت معي في كل وقتي على الجاه
وابيوت شعري كلها من صممها
ولو الحجر ينطق بنسمع حزاياه
وامن البلاغه وانطقت من بكمها
تسكن بوسط الجوف داخل حناياه
قرينة للنفس باعروق دمها
من ذو القدم عهد الوفاء مانقضناه
وبوقت الطلب فكري عليها زهمها
ومن دونها نفسي علي غير مجهاه
من صدقها وفت وبرت قسمها
وتجزل علي بالشعر والفكر تقراه
وعلى الجزالة مايوقف سهمها
ومن وقتها للحين والشعر مشكاه
مشكاة نور هاجسي يلتهمها
تغدق علي بالشعر والقلب مجناه
قصايداً جزله وفكري نظمها
الشاعر : ظافر المشعلي_الخبر
