وهج المشاعر

سكة طويلة

 

الشاعر _سعد العبدلي _عنيزة

غابت سنين وقفلت دوني الباب
ومافيه درب الاّ سلكته وراها

راحت وقفت دون توديع وأسباب
ولاعاد أميز ضيقها من رضاها

صرت اتخيلها مع أغراب وأحباب
لو كان مايشبه حلاهم حلاها

في ديرتي والناس من حولي اجناب
كن الوطن ماعاش برضه سواها

وجلست اعالج جرحها لين ماطاب
وفتحت للدنيا نسايم هواها

وجتني تقول الحب والشوق غلاب
وإني على الذكرى وأعيش بصداها

لك صورتن حفظتها تحت الاهداب
اخفيتها لو كان زايد سناها

وكأنك تقول أن الهوى زيف واكذاب
وتحكم علي احكام جاير مداها

طالع سميّك في محلات الألعاب
اسمه هوى نفسي وغاية رجاها

جاوبتها شبنا ودرب الهوى شاب
قصة قديمة تحزن اللي رواها

هذا قدر مكتوب ماعنه مجناب
سكة طويلة تتعب اللي مشاها

والحر طيرن مايبي جمع واسراب
مايلتفت في صيدتن مارماها

روحي وصكي دوني القفل والباب
واخذي معك هم السنين وعناها

اترك تعليقاً

زر الذهاب إلى الأعلى