اذا حلمنا يجي حلمٍ تحقق تمام
ما نحلم الا يصير الحلم مثل اليقين
يا بلادنا عيدي عيدٍ به العز دام
يشرق به النور للعالم من المسجدين
عيد الوطن كلنا نستقبله بإلتحام
ماعندنا حزبٍ ايسارٍ وحزبٍ يمين
العالم اليوم ينظرنا بكل اهتمام
في رؤيةٍ تعبتهم من مئات السنين
وحنا صنعنا بها الامجاد في ظرف عام
في معجزة رغم انُوُف العالم المحبطين
الله يزيدك ونفرح فيك في كل عام
وانتي بخير ورخاء وملوكنا سالمين
اشرق بك النور من عبد العزيز الإمام
يابلادنا الدانه اللي تسعد الناظرين
سماك سحب ومطر واسرابٍ من الحمام
في كل يومٍ على صرح العلاء تصعدين
والراية اللي بها التوحيد فوق الحسام
من حولها تجتمع دوله وشعب فطين
المملكة دار عز ودار عدل و سلام
ومن فضل ربي جعلها قبلة المسلمين
يا دارنا انتي مكان الأمن واحسن نظام
وانتي وصلتي مكانة تسعد العالمين
في نهضةٍ شاملة تحظى بكل اهتمام
متابعه من ولي عهدٍ علينا أمين
فيها سواعد بناء فيها عقول الكرام
فيها الوفاء و الولاء وبربها تستعين
اهدافنا رؤيةٍ وانظارنا للأمام
وعزمٍ على الحق ثابت قاسيٍ مايلين
حنا نعرف اللائام وعارفين الكرام
وما يكره المملكة إلا من اصله هجين
وحنا نراقب بصمت وعيننا ما تنام
واذا زعلنا على من غره ابليس شين
نصبر ونعطي فرص ومؤجلين الخصام
حتى نشوف الخطأ يكبر على الصابرين
نعرف ويش اللي يديرونه وحوش الظلام
ونبيد كل الذي يمشى مع الظالمين
واللي ما يهتم فينا مال حجمه مقام
ونجزاه مثل اللي قدمه لنا مرتين
الله خلقنا كذا ما نعرف الانهزام
طبعٍ ورثناه ونوصّي به الوارثين
المهدي بن تركي البقمي_ جدة
